Силни експлозии одекнаа во текот на изминатата ноќ низ целиот окупиран украински полуостров Крим, предизвикувајќи низа пожари на повеќе клучни локации. Поради нападот, Керчкиот мост беше целосно затворен за сообраќај во текот на целата ноќ, пренесува „Украинска правда“.
Локалните Телеграм канали „Кримски ветер“ и „Супернова+“ јавуваат дека ударите биле почувствувани во неколку региони. Сателитските снимки потврдија дека се појавиле нови жаришта на нафтениот терминал Керч, кој е во пламен уште од првиот удар регистриран на 21 јуни.
Пожари избувнаа и на самиот влез во Керч, како и во близина на селото Бахерово, каде што се стационирани руските системи за воздушна одбрана С-300 и С-400. Сателитите евидентираа оган и на нафтениот терминал во пристаништето Кавказ, како и на железничката станица Пивденна во Керч.
Каналот „Супернова+“ објави дека рано наутро бил успешно погоден комплексот за претовар и складирање на гориво „ТЕС-Терминал“. Руските власти на Крим сè уште не ги коментираат овие инциденти.
Блокадата на Керчкиот мост започнала пред полноќ и траела повеќе од пет и пол часа. На автомобилите им било дозволено повторно да го преминат мостот дури рано наутро во 05:10 часот.
Овие напади доаѓаат по јавниот повик на претседателот на Меџлисот на кримските Татари, Рефат Чубаров, кој на 16 јуни порача: „Ги повикувам сите руски државјани кои нелегално престојуваат во окупираниот Крим веднаш да го напуштат полуостровот“. Успешните дејствија врз целите во Керч ги потврди и украинскиот претседател Володимир Зеленски.
Поради сериозните оштетувања, руската администрација воведе строги ограничувања за продажба на бензин, па така никој освен претставниците на окупаторската администрација не може да купува гориво на пумпите.
Дополнително, на Крим се воведени и рестрикции на електричната енергија, која на граѓаните им се прекинува според строго дефиниран распоред.