Пратениците денеска ќе разгледуваат повеќе законски предлози, извештаи и одлуки на собраниска седница, меѓу кои и измени во царинската регулатива, ревизијата и зоотехниката, како и предлози за ратификација на меѓународни договори.
На дневен ред се Извештајот за работата на Комисијата за хартии од вредност за 2025 година, финансиските извештаи на Агенцијата за супервизија на осигурување за 2025 година, ревидирани од овластен ревизор, како и Извештајот за реализација на годишната програма за работа и развој на Агенцијата за цивилно воздухопловство за 2025 година.
Пратениците ќе расправаат и за два предлог-закони за ратификација. Едниот се однесува на измените на Протокол 4 кон Спогодбата за партнерство, трговија и соработка меѓу Република Северна Македонија и Обединетото Кралство, а другиот на изменувањето и дополнувањето на договорот ЦЕФТА, со кои се предвидуваат мерки за олеснување на електронската трговија.
Во рамки на седницата ќе бидат разгледани и Предлог-законот за изменување на Законот за Царинската тарифа и Предлог-законот за изменување и дополнување на Законот за ревизија, и двата по скратена постапка, како и Предлог-одлуката за давање согласност на статутарните измени на Универзитетот „Мајка Тереза“ во Скопје.
На дневен ред е и Предлог-законот за изменување и дополнување на Законот за зоотехника, кој ќе се разгледува во прво читање.