Вицепремиерот и министер за транспорт Александар Николоски, во гостувањето на ТВ Сител, информираше за постигнатите договори со турските министри за трговија и за транспорт за време на Бизнис форумот во Истанбул.
Според неговите зборови, од 2 јули се воведува нова директна авиолинија Анкара-Скопје, а договорено е и железничко карго поврзување меѓу двете земји.
Николоски потенцираше дека голем број турски компании покажале сериозен интерес за инвестирање во Македонија.
Министерот додаде дека односите меѓу двете држави се одлични, што се потврдува и со официјалниот пречек на премиерот Христијан Мицкоски од страна на турскиот претседател Реџеп Таип Ердоган.
„Има голем интерес на турски компании да инвестираат во Македонија, причина е што Македонија има договор за слободна трговија со EУ и одличен договор со САД. Турција има проблем во извозот во Европската Унија и одредени компании се заинтересирани токму во Македонија да инвестираат. Понатаму, тука е блискоста помеѓу двата народа и двете држави и релативната близина има добра поврзаност. Веќе Туркиш Ерлајнс покрај Скопје, почна да лета за Охрид, а од 2 јули започнува директен лет на АЏет од Анкара до Скопје. Морам да нагласам дека е без субвенции, што значи дека воопшто не побараа субвенции и мислам дека е добро да ја отворат. Заедно со двајцата министри, министерот за трговија, министерот за транспорт и инфраструктура договоривме и карго поврзување помеѓу двете држави, имајќи предвид дека едниот крак на Коридор 10 започнува во Истанбул и тоа е најкраткиот пат за роба од Турција до Централна Европа, изјави Николоски.
На прашањето дали се очекува трговската размена меѓу двете земји да достигне вредност од 2 милијарди долари, вицепремиерот одговори потврдно.
Тој заклучи дека ваквиот раст е реален бидејќи, покрај турските инвестиции во земјава, евидентиран е и зголемен број на македонски компании кои инвестираат во Турција.