Кинеското Министерство за државна безбедност упати официјално предупредување дека странски разузнавачки служби користат морски животни опремени со сензори за собирање чувствителни информации во кинеските територијални води.
Во својата објава на социјалните мрежи, Министерството предупреди за употреба на „нови видови шпионска опрема“ за прибирање морски податоци кои би можеле да имаат директно воено значење.
Според кинеските власти, во нивните води веќе биле забележани поголеми морски животни, меѓу кои желки и риби, опремени со специјални сензори за набљудување.
„Тие животни се движат во одредени области со цел да собираат чувствителни податоци за морската средина, како што се температурата на водата, соленоста и морските струи, а потоа информациите ги пренесуваат во странство преку сателит“, наведува Министерството.
Кинеските власти дополнително тврдат дека странски организации користат специјализирани пловки со сензори, како и опрема поставена на трговски бродови, со која во реално време се следат сите активности во пристаништата.
Според Пекинг, вака собраните податоци може да се искористат за изработка на детални подводни карти со цел да се идентификуваат потенцијалните слабости во крајбрежната одбрана на Кина.
Министерството поради ова побара построга контрола на увезената опрема и ги повика рибарите и поморските работници веднаш да пријават доколку откријат какви било сомнителни пловки или уреди во водата.
Тензиите меѓу Кина и западните земји околу меѓусебните обвинувања за шпионажа и национална безбедност траат со години.
Во јуни годинава, разузнавачкиот сојуз „Пет очи“ предупреди дека кинески агенти се претставуваат како онлајн-регрутери за да дојдат до доверливи информации од потенцијални извори.