Вистинска паника се рашири на социјалните мрежи откако масовно почнаа да се споделуваат фотографии од морето во Солунскиот Залив (Термаикос) кое преку ноќ ја промени бојата во зелено-жолтеникава и почна да шири исклучително непријатен мирис.
Иако паничните објави во туристичките Фејсбук групи експресно беа избришани од администраторите за да не се бркаат туристите, научниците потврдуваат дека овој феномен се јавува од време на време.
За среќа, не станува збор за никакво хемиско загадување или истурање отров, туку за познат природен феномен.
„Ова е природен феномен познат како морски цвет (или цветање на алги). Кога ќе се спојат високите температури на воздухот и морето, мирното време без ветер и зголемената количина на хранливи материи во водата, се јавува експлозивна пролиферација на фитопланктон, микроскопски алги.“
Како резултат на ова цветање, водата на површината станува густа, лигава и често се формира пена или лебдечки „дамки“, кои ветерот и морските струи ги носат кон солунскиот кеј.
Сепак, туристичките работници смируваат дека нема место за паника кај оние кои патуваат на Халкидики или во Олимписката регија.
„Солунскиот Залив е затворен и се наоѓа веднаш до град со милиони жители, па затоа е подложен на ова. Ова не значи дека плажите каде што се капат туристите се во иста состојба. Феноменот е краткотраен. Доволно е ветерот да се промени и сè ќе исчезне за 24 до 48 часа.“