Министерката за образование и наука, проф. д-р Весна Јаневска, денеска присуствуваше на свечената промоција на новата генерација дипломци на Универзитетот „Мајка Тереза“ во Скопје.
Јаневска упати честитки до новите академски граѓани, нагласувајќи ја нивната идна улога во економскиот и општествениот напредок на државата.
„Присуствував на промоција на нова генерација дипломци на Универзитетот „Мајка Тереза“. Упатив искрени честитки до сите кои официјално станаа академски образувани граѓани и изразив очекувања за активно учество во општествениот живот и придонес кон развојот на Македонија.“
Министерката посочи дека државата веќе презема конкретни системски чекори за да им овозможи на младите научници соодветна перспектива во земјава.
„Знам дека еден дел ќе се вклучат на пазарот на трудот, ќе најдат ангажман во постојните компании или преку сопствени идеи и претприемачки иницијативи ќе ја поттикнат конкуренцијата. Дел ќе го изберат патот на науката, а Македонија има потреба од млад научно-истражувачки кадар и затоа преку низа системски мерки работиме на создавање подобри услови за негов развој, напредување и меѓународна афирмација.“
Во својата објава, Јаневска ја потенцираше и важноста на наставниот кадар, најавувајќи ги и претстојните законски реформи во високото образование.
„Благодарност до професорите за нивната посветеност, за пренесеното знаење, искуство, време и трпение. Со многумина имаме заедничка соработка на активности насочени кон унапредување на високото образование и науката. Особено ми е драго што заеднички работевме на подготовка на новата законска регулатива во оваа област, која наскоро ќе се најде пред пратениците. Убедена сум дека со заедничка визија и посветеност ќе создадеме поконкурентен и поквалитетен систем на високо образование и научно-истражувачка дејност.“