Шестото издание на Фестивалот за класичен балет и модерен танц ќе се одржи од 6 до 9 јуни во Македонскиот народен театар, во организација на Детскиот културен центар – Карпош.
Како што соопштуваат организаторите, станува збор за уникатно културно случување, единствено од ваков тип во земјата, кое веќе шест години претставува значајна референтна точка за љубителите на балетската уметност и современиот танц. Фестивалот, како што истакнува директорката д-р Билјана Лалчевска Серафимовска, е простор каде се среќаваат традицијата, современиот израз и младите таленти како иднина на македонската танцова сцена.
Организацискиот одбор одлучи наградата за животно дело „Ѓорѓи Македонски“ оваа година да ѝ биде доделена на Зоица Пуровска Велевска, за нејзиниот исклучителен придонес во развојот и афирмацијата на балетската уметност. Како што посочува м-р Маја Каревски, уметнички директор на фестивалот, наградата претставува признание за долгогодишната посветеност на уметницата.
Исто така, наградата „Ѓорѓи Македонски“ ќе биде доделена и на младиот танчер Лука Ѓорѓиевски, за неговата креативност, труд, уметнички потенцијал и достигнувања во областа на танцовата уметност.
Во рамки на фестивалот ќе се одржат две фестивалски вечери и две работилници посветени на класичниот балет и модерниот танц. Публиката ќе има можност да проследи настапи на танчери, балерини и уметници од земјата и странство.
Меѓу гостите се солистите Наташа Трендафилова Гицев и Baláz Lőcsei од Националната опера и балет, Националниот балет на Косово, ученици од ДМБУЦ „Илија Николовски-Луј“, како и гости од Istanbul Junior Ballet, Денс студио Мак од Куманово, балетското студио Балерина и балетската секција при Детскиот културен центар – Карпош од Скопје.
Статуетките и годинава се изработени специјално за фестивалот од M Art Gallery, а поддржувачи се и Mayo store.
Фестивалот се реализира со поддршка на Град Скопје.