Претседателката Гордана Сиљановска-Давкова денеска ќе го посети Националниот центар за култура и образование во Братислава, каде што е поставена изложбата „Од глаголица до светлина: Визуелна ода за Светите Кирил и Методиј“.
На изложбата се претставени дела од македонските уметници Ана Митевска, Ангел Коруновски, Лазе Трипков и Александра Костадиновска, под кураторство на Кирил Пенушлиски.
Преку сликарство, фотографија и современи визуелни изрази, авторите го истражуваат односот меѓу историската меморија и современата уметност, инспирирани од духовното и културното наследство на Светите Кирил и Методиј, глаголицата и словенската писменост.
Според организаторите, изложбата нуди современ поглед на културното наследство, претставувајќи го како жива духовна и визуелна вредност што и денес комуницира со современото општество.
Изложбата е отворена од 27 мај и ќе може да се посети до 16 јуни. Реализирана е со поддршка на македонската Амбасада во Братислава и Министерството за култура и туризам.