Најмалку девет лица го загубија животот, а десетици се повредени во големиот воздушен напад што Русија го изведе врз повеќе градови низ Украина во текот на ноќта.
Градоначалникот на Киев, Виталиј Кличко, информираше дека во главниот град биле погодени две високи станбени згради, при што постојат стравувања дека под урнатините сè уште има заробени луѓе.
„Во моментов, во главниот град се познати четири смртни случаи. Пријавени се 51 повредени лица, вклучувајќи три деца. Лекарите хоспитализирале 35 лица, а на останатите им е укажана помош на лице место и амбулантски“, рече Кличко во објава на Телеграм.
Според неговите извештаи од терен, штетите се распространети во повеќе зони на градот. Како што изјави тој, „како резултат на масовниот напад на непријателот врз главниот град, евидентирана е штета во различни делови од градот“.
Пред почетокот на ударите, првиот човек на Киев упати предупредување до граѓаните за можноста од масовен напад и апелираше населението да остане во безбедните засолништа.