Државните студентски домови „Стив Наумов“ и „Кузман Јосифовски – Питу“ во Скопје се првите два кои целосно ќе бидат реновирани и пуштени во употреба на стартот на новата академска година. Градежните работи се одвиваат паралелно и ќе завршат во јули, по што ќе следи комплетно опремување на собите и просториите.
Министерката за образование и наука, проф. д-р Весна Јаневска, денеска направи увид во активностите при посетата на студентскиот дом во Автокоманда. Таа најави дека објектите ќе понудат значително повисок стандард за младите.
„Условите ќе бидат модерни, по високи европски стандарди за сместување, но и за енергетска ефикасност. Сигурна сум дека студентите ќе уживаат во престојот. Нема да има бркање глодари и инсекти, нема да има промаја, лепени прозорци и неисправни тоалети и бојлери. Дополнително за сето тоа да се одржува и трае, го менуваме и моделот на финансирање. Се разбира, чувањето на објектите и одржувањето на опремата зависи и од самите студенти“, рече Јаневска.
Јаневска додаде дека се обезбедени средства за почеток на реконструкција и во останатите 7 државни студентски домови. За овој проект таа упати благодарност до Европската унија, Германската развојна банка и Фондот за инвестиции на Западен Балкан, појаснувајќи дека вкупниот буџет изнесува околу 50 милиони евра, од кои над 10 милиони се неповратни грантови.
„Продолжуваме да го подобруваме студентскиот стандард, условите за едукација, сместување и престој, како и да обезбедуваме финансиски олеснителни права и средства за поддршка, бидејќи младите се најважните граѓани на Македонија и без нив не можеме да очекуваме перспективна иднина. Целта е да ги задржиме тука и да бидат задоволни од грижата од државата“, нагласи министерката.
Во однос на останатите студентски мерки, Јаневска потсети на проширениот опфат на субвенционираниот оброк, ИТ ваучерите, бесплатниот градски превоз во Скопје и дигитализацијата на апликациите, отфрлајќи ги тврдењата на опозицијата дека ќе се кратат стипендиите.
„Повторно ќе имаме 3000 стипендии во новата академска година, а дури ќе понудиме и нова категорија – за прв пат за студенти со попреченост и ретки болести, со што ќе одговориме на барањата на нивните здруженија и политиките на стипендирање ќе стануат поинклузивни и во согласност со барањата на ЕУ“, истакна Јаневска.
