Неколку основни и средни училишта во Загреб утрово добија дојави за поставени експлозивни направи, по што веднаш беше започната итна евакуација на учениците и вработените. Полицијата е на терен и ги пребарува објектите.
Според првичните информации, заканувачките пораки пристигнале на електронските адреси на училиштата во неколку загрепски населби. Хрватското Министерство за внатрешни работи потврди дека се преземаат сите стандардни безбедносни протоколи.
„Полициските службеници веднаш по дојавите излегоа на терен и во соработка со раководствата на училиштата започнаа евакуација на децата и персоналот. Се вршат детални антидиверзиони прегледи“, соопштуваат од загрепската полиција.
Ова не е првпат училиштата во Хрватска да бидат мета на вакви лажни или вистински закани. Слични бран на дојави беше регистриран и во претходниот период во градови како Сплит и Риека.
Надлежните апелираат до граѓаните и родителите да останат смирени додека траат проверките. Полицијата веќе работи на следење на IP адресите од кои биле испратени заканувачките мејлови.
Истрагата за откривање на испраќачот е во тек, а наставата во засегнатите училишта е прекината до целосно расчистување на случајот и потврда дека објектите се безбедни.