Министерката за образование и наука, Весна Јаневска, за време на својот работен престој во Лондон ја посети македонската амбасада, каде што оствари средба со професорката Ана Илиевска Завршник. Професорката го предава македонскиот јазик на престижниот универзитетски центар UCL-SSEES во британската престолнина.
Јаневска преку својот официјален профил ги сподели деталите од средбата и го истакна значењето на оваа образовна мисија.
„Во рамки на мојот престој во Лондон, каде учествувам на Светски образовен форум, ја посетив и македонската амбасада. Се сретнав со професорката Ана Илиевска Завршник, која предава македонски јазик на Школата за словенски и источноевропски студии при University College London (UCL-SSEES).“
Министерката упати јавна благодарност и признание за посветеноста со која македонскиот лекторат во Лондон ги презентира домашните вредности и идентитет.
„Нејзината мисија е исклучително важна – да ги промовира македонскиот јазик, традиција и култура во Обединето Кралство и тоа го прави со голем ентузијазам и посветеност. Честитки за досегашните резултати и искрена благодарност за придонесот во афирмацијата на македонскиот јазик и културен идентитет надвор од нашата држава.“