Нема формула за брза транзиција на еден образовен систем од фаза на ран развој кон извонредност. Потребно е време и голема посветеност кон остварување на претходно поставени реални цели и јасно дефинирани политики што ќе се базираат на факти. Ова го истакна министерката за образование и наука проф. д-р Весна Јаневска на панел дискусија посветена на креирање политики базирани на факти, во рамки на Светскиот образовен форум во Лондон.
Министерката нагласи дека македонската влада образовните политики ги темели на спроведени анализи и преку мерливи критериуми ја утврдува ефикасноста, при што технологијата има голема улога, но клучот останува кај луѓето.
„Во денешно време располагаме со голем број податоци и важно е тие да се анализираат и врз основа на тоа да се креираат политиките. Технологијата, особено вештачката интелигенција ни помага во собирањето и обработката, но сепак во процесот најважен е човечкиот фактор и не може да биде заменет“, рече Јаневска.
Како јасни показатели за промени во Македонија, Јаневска ги посочи резултатите на учениците од меѓународните тестирања како ПИСА и ТИММС, податоците од Шангајската ранг листа, анализите на УНИЦЕФ, ОЕЦД и Светска Банка, но го истакна и значењето на мислењето на наставниците, стручните служби, родителите и учениците.
На панелот се обратија и Алфа Бакар Бери, министер за стручно образование на Гвинеја, Андреас Шлајхер од ОЕЦД и Берџ Акијан од организацијата Клас Линк. Говорниците се согласија дека собирањето докази обезбедува легитимитет на процесот. Инаку, Светскиот образовен форум е најголемиот глобален собир на министри за образование, а годинава темата е „Образование за заедничка иднина: Мир, планета, цел и патеки“, со фокус на улогата на знаењето во време на глобална неизвесност.