Политичката партија Движење ЗНАМ за Наша Македонија преку официјално соопштение упати јавен повик до раководството на СДСМ и нивниот лидер Венко Филипче, барајќи одговори за наводни деловни релации и сопственост на фирми во соседна Бугарија. Од Центарот за комуникации на ЗНАМ истакнуваат дека отсуството на демант или одговор од опозицијата само ги зголемува сомнежите во јавноста.
„Бидејќи по вчерашната прес конференција на Движење ЗНАМ за Наша Македонија, немаше никаков одговор од раководството на СДСМ, денес повторно ги прашуваме Венко Филипче и СДСМ: Зошто молчат за фирмите и деловните релации во Бугарија? Молкот на СДСМ и Венко Филипче само дополнително ги засилува сомнежите во јавноста дека зад нивните политики и ставови не стои никаква принципиелна борба за европска иднина, туку заштита на бизнис интереси и лични врски со Бугарија. Доколку нема што да кријат, тогаш нека излезат пред македонската јавност, нека го погледнат народот во очи и нека ја кажат вистината за целта, сопственичката структура и работењето на овие фирми.“
Во соопштението, кое МИА го пренесува интегрално, партијата испорача четири конкретни прашања поврзани со фирми регистрирани во градот Петрич, лоцирајќи одговорност кај сегашното и поранешното раководство на СДСМ.
„Прашуваме повторно:
- Дали Венко Филипче е сопственик или поврзано лице со фирмата „ПАУЪР АЙ8“ ЕООД / POWER i8 Ltd. во Петрич, со дејност поврзана со недвижности?
- Дали семејството Заеви е поврзано со фирмата „ГОМАСИДРА“ ЕООД / GOMASIDRA Ltd., исто така регистрирана во Петрич?
- Колку фирми на лица блиски до поранешното и сегашното раководство на СДСМ се регистрирани на иста адреса во Петрич?
- Какви бизниси и економски интереси имаат овие структури во соседна Бугарија? Одважи се Венко, покажи го вистинското лице!“
На крајот од партиската реакција, Движењето ЗНАМ се осврнува на досегашното владеење на опозицијата и порачува дека членовите на СДСМ, но и целата македонска јавност, имаат право да знаат што реално стои зад нивната политичка реторика.
„Граѓаните имаат право да ја знаат вистината, не само за фирмите, туку и за тоа што навистина стои зад нив. А најмногу вистината ја заслужуваат членовите и симпатизерите на СДСМ… Тие не смеат да бидат оставени во дилема или да бидат последни што ја дознаваат вистината за тоа кому всушност му служи бугарофилската политика што ја поддржуваат. Осум години додека беа на власт, СДСМ ја отвори вратата за најголемите национални порази и наместо црвени линии, поставуваа црвени теписи за туѓи агенди кои длабоко го разнишаа достоинството на македонскиот народ. Македонија заслужува да знае дали зад европската реторика на СДСМ се крие истата политика на отстапки, сервилност и поданост кон туѓи интереси. Движењето ЗНАМ за Наша Македонија ќе продолжи јавно и отворено да ги поставува овие прашања сè додека јавноста не добие целосни и транспарентни одговори.“