Американскиот претседател Доналд Трамп изјави дека го губи трпението со Иран, по разговорите што ги водеше со кинескиот претседател Си Џинпинг во Пекинг во врска со воениот конфликт на Блискиот Исток.
Според соопштението на Белата куќа, Трамп и Си постигнале согласност дека Ормускиот Теснец мора да остане отворен за пловидба. Ова прашање стана критично откако Иран го затвори теснецот за поголемиот дел од бродовите по почетокот на американско-израелските напади на 28 февруари, предизвикувајќи сериозни нарушувања во глобалното снабдување со енергенси.
„Нема уште долго да бидам трпелив. Иран мора да склучи договор“, изјави децидно Трамп, кој во својот говор директно се осврна и на прашањето со иранските залихи на збогатен ураниум.
Американскиот претседател информираше дека за време на средбата добил уверување од својот кинески колега дека Пекинг нема воено да го помага Техеран во овој конфликт.
„Тој рече дека нема да дава воена опрема и тоа е голема изјава“, кажа Трамп, нагласувајќи ја важноста на ветувањето од Си Џинпинг.
Експертите и аналитичарите оценуваат дека со овој потег Трамп се обидува да обезбеди силна кинеска поддршка за ставање крај на конфликтот. Ова прашање, според нив, станува клучен политички адут за администрацијата во Вашингтон пред претстојните американски меѓуизбори кои ќе се одржат во ноември.