Вкупно 10 лица кои биле во контакт со заразени од хантавирус на оддалечени острови во Атлантскиот Океан, итно ќе бидат вратени во Обединетото Кралство. Станува збор за патници од крузерот „Хондиус“ и медицински персонал кои веднаш по пристигнувањето ќе бидат ставени во превентивна изолација.
Британската служба за здравствена безбедност потврди дека групата е веќе изолирана и се чека нивниот транспорт. Евакуираните во моментов се наоѓаат на две локации: дел на островот Асенсион, а останатите на островот Света Елена.
Надлежните смируваат дека лицата засега се во добра здравствена состојба.
„Евакуираните лица засега не покажуваат симптоми на хантавирус, а карантинот се спроведува исклучиво како превентивна мерка за да се спречи евентуално ширење на вирусот на британско тло“, соопштуваат службите.
Жариштето првично се појави на бродот „Хондиус“ во јужниот дел на Атлантикот. Досега 32 гости и еден член на екипажот беа евакуирани на Света Елена, додека две лица се извлечени од пристаништето на Асенсион. СЗО будно ја следи состојбата поради можноста за нови случаи.