Иранскиот парламент планира да разгледа зголемување на нивото на збогатување на ураниум на 90% во случај на нов воен напад од страна на Соединетите Американски Држави. Ваквата најава доаѓа од пратеникот Ебрахим Резаи, портпарол на парламентарниот комитет за национална безбедност и надворешна политика.
Резаи преку социјалните мрежи информираше дека ова е една од клучните опции за кои во моментов се дискутира во Техеран како одговор на евентуална нова ескалација.
„Една од опциите на Иран во случај на уште еден напад би можела да биде збогатување од 90%. Ќе го анализираме ова во парламентот“, изјави Резаи.
Ваквото ниво на збогатување е критично бидејќи, додека нуклеарните централи за цивилни цели користат ураниум збогатен од 3 до 5%, за производство на нуклеарно оружје е потребно токму ниво од 90%.
Заканата од Техеран доаѓа по извештаите во американските медиуми дека претседателот Доналд Трамп размислува за нови напади врз Иран со цел да ја ослабне нивната позиција во преговорите. Трамп претходно ја оправда воената акција со тврдењето дека на Иран под ниту еден услов не смее да му се дозволи развој на нуклеарно оружје.