Цената на нафтата утрово повторно порасна, откако американскиот претседател Доналд Трамп го оцени како „целосно неприфатлив“ одговорот на Иран на американскиот предлог за прекин на војната. По неговата објава, брент нафтата се искачи над 105 долари за барел, а американската сурова нафта се приближи до 100 долари.
Пазарите реагираа поради стравувањата дека преговорите може да пропаднат и дека кризата околу Ормутскиот Теснец ќе продолжи да го нарушува глобалното снабдување со енергенси. Според медиумските извештаи, Техеран преку Пакистан доставил предлог во кој бара прекин на војната, укинување на санкциите и гаранции поврзани со теснецот.
Ормутскиот Теснец е еден од клучните светски премини за транспорт на нафта и течен природен гас, па секоја закана за неговото функционирање веднаш се одразува врз цените на енергенсите и ги зголемува стравувањата од нов инфлаторен притисок.