Членката на Извршниот одбор на СДСМ, Наташа Поповиќ, на денешната прес-конференција упати остри критики до власта по инцидентот со семејно насилство во кој е инволвиран член на обезбедувањето на премиерот Мицкоски. Од опозициската партија обвинуваат дека институциите немаат капацитет да ги заштитат граѓаните.
„Уште еден скандалозен случај, човек од обезбедувањето на премиерот Мицкоски завршува во притвор за семејно насилство. Брутално ја претепал сопствената сопруга. Ова е слика на опкружувањето на Мицкоски и на една криминална Влада во која насилството е нормализирано а институциите немаат капацитет за ништо“, изјави Поповиќ.
Од СДСМ истакнуваат дека одговорноста за обезбедувањето на премиерот и состојбите во полицијата е директно кај министерот Панче Тошковски.
„Полицијата е партизирана со законот за МВР и служи исклучиво за заштита на криминалната група ВМРО и за злоупотреби против опозицијата. Ако полицајците на Тошковски се тепачи и учесници на семејно насилство, нема систем што може да се воспостави за превенција ниту пак заштита на жртвите“, се вели во соопштението.
Поповиќ потсети на низа случаи на врсничко и семејно насилство низ државата, како и на неодамнешните убиства во Велес и Старо Нагоричане, тврдејќи дека институциите ги игнорираат пријавите на жртвите. Таа го спомена и случајот во Кочани, како и шверцот на пет тони дрога, за кои исто така нема одговорност.
„Што уште треба да се случи за Панче Тошковски да понесе морална одговорност и да поднесе оставка? Оставка веднаш!“, порачаа од СДСМ.