Во импровизираната судница во затворот „Идризово“, денеска треба да продолжи судскиот процес за катастрофалниот пожар во кочанската дискотека „Пулс“. На денешното рочиште е предвидено сослушување на вешто лице од Институтот за судска медицина.
На претходното рочиште, одржано на 28 април, Обвинителството ја презентираше медицинската документација за над 200 повредени лица кои побарале помош по трагедијата на 16 март минатата година.
Обвинителката Наташа Сарамандова ги изнесе деталите за повредите кај 157 лица со тешки телесни повреди и уште 65 лица со телесни повреди, меѓу кои има и 20 деца.
„Вештачењата на медицинската документација на повредените во пожарот на 16 март 2025 година констатира повреди од штетни гасови и интоксикација, тешки телесни повреди со изгореници на лицето, рацете, телото и грбот од 6 до 30 % од вкупната површина на телото“, стои во доказите на Обвинителството.
Документацијата открива и тешки повреди на дишните органи поради вдишување јаглероден моноксид, како и скршеници на ребра и прешлени кај дел од преживеаните.
Одбраната реагираше на начинот на изведување на доказите, тврдејќи дека станува збор само за читање на листата, а не за суштинско изведување на доказите.
Претходно беа изведени обдукциските наоди кои потврдија дека кај 59 жртви смртта настапила како резултат на труење со јаглероден моноксид. Кај останатите жртви смртта е констатирана како последица на задушување поради притисок врз градниот кош или изгореници од трет степен.
Вештачењето на денешното рочиште треба да даде одговори на клучните прашања за тоа колкаво присуство на гасови во крвта е смртоносно и дали жртвите би можеле да бидат спасени со навремена кислородна терапија.