Наташа Поповиќ, членка на Извршниот одбор на СДСМ, на денешната прес-конференција го обвини претседателот на Владата и лидер на ВМРО-ДПМНЕ, Христијан Мицкоски, дека подготвува терен за префрлање на вината врз опозицијата за евентуалниот неуспех во евроинтеграциите.
Според СДСМ, најавите дека Изборниот законик е закочен од нивна страна се „класична лага“, со оглед на тоа што владејачкото мнозинство има капацитет самостојно да носи закони.
„Вистината е едноставна: ВМРО-ОКГ има апсолутно мнозинство во Собранието и може самостојно да донесува закони. Како што без консензус и без поддршка од СДСМ ја укинаа техничката влада, така можат да го донесат и Изборниот законик“, изјави Поповиќ.
Таа додаде дека Мицкоски ветувал оти Македонија во јуни ќе биде „рамо до рамо со Црна Гора“, но сега веќе подготвува изговори зошто тоа нема да се случи. Главните причини, според Поповиќ, се неисполнувањето на обврските за уставни измени и клучните реформи.
„Нема да ги внесе малцинствата во Уставот, нема да ги затвори осумте клучни реформски точки и нема да ги реши проблемите што самиот ги продлабочи: криминал, корупција, партизација на институциите и контрола врз судството и обвинителството“, нагласи таа.
Од СДСМ порачаа дека нема да дозволат да бидат вовлечени во сценарио на манипулации, тврдејќи дека граѓаните јасно гледаат кој го блокира патот кон Европа.