Израелскиот премиер Бенјамин Нетанјаху порача дека Израел задржува целосна „слобода на дејствување“ против Хезболах, нагласувајќи дека разоружувањето на оваа милитантна група е клучниот фактор за каков било напредок во преговорите со Бејрут.
Во своето обраќање пред високото воено командување на израелската армија, Нетанјаху го истакна правото на Израел да напаѓа цели низ Либан со цел спречување непосредни закани. Според него, континуираниот воен притисок е тоа што ќе овозможи напредок во дипломатските преговори.
Тој пред генералите ги наброја досегашните „големи успеси“ на армијата, потенцирајќи ја елиминацијата на огромниот дел од ракетниот арсенал на Хезболах и повторното воспоставување на „безбедносна зона“ во јужен Либан.
„Таа зона ја спречува можноста за инвазија на северот на Израел, а сега и директен противтенковски оган, додека истовремено ни овозможува да ја промениме ситуацијата во Либан. Нашата слобода на дејствување за спречување нови закани е дел од договорот постигнат со САД и либанската влада“, изјави Нетанјаху, повикувајќи се на условите од примирјето кое беше продолжено минатата недела.
Според проценките на израелскиот премиер, на Хезболах му преостануваат само околу 10 проценти од ракетниот арсенал што го поседуваше пред почетокот на борбите минатиот месец. Сепак, тој предупреди дека сè уште постојат две клучни закани кои армијата мора да ги реши – ракетите од калибар 122 милиметри и беспилотните летала (дронови).
„Ако Израел успее да ги неутрализира тие закани со комбинација на оперативни и технолошки средства, ние во суштина сме на пат кон целосно разоружување на Хезболах. Верувам дека ако го решиме ова, ќе можеме да ги решиме работите и на дипломатски план“, заклучи Нетанјаху.