Претседателот на Социјалдемократскиот сојуз на Македонија (СДСМ), Венко Филипче, денеска упати остри критики кон актуелната власт и премиерот, обвинувајќи ги за неконзистентност и работење против државните интереси.
Одговарајќи на новинарско прашање поврзано со темата за двојните државјанства на владини функционери, Филипче истакна дека изјавите на премиерот се во целосна спротивност со постапките на неговите пратеници.
„Треба да се реши премиерот што и како кажува. Неговите пратеници поднесуваат предлог-закон, а тој вели дека треба да се консултираат уставни експерти, еве сега наводно бил заинтересиран. На тој човек веќе едноставно ништо не може да му се верува“, изјави Филипче.
Лидерот на опозицијата го доведе во прашање и мотивот на дел од функционерите во извршната власт, посочувајќи дека нивната лојалност кон државата е сомнителна.
„Оваа влада ја водат луѓе коишто имаат резервна татковина и прашање е дали воопшто работат за интересите на оваа држава“, заклучи претседателот на СДСМ во своето обраќање.