Тешка несреќа се случи утринава на градилиште на улицата „Козјак“ во скопската населба Кисела Вода, при што еден градежен работник го загуби животот, а тројца други се здобиле со тешки повреди.
Според информациите од Итната медицинска помош дадени за МИА, на местото на несреќата интервенирале четири амбулантни возила. Доктор Драган Панов, шеф на смена во Итната помош, потврди дека загинатиот работник е на 34-годишна возраст, додека повредените лица се на возраст од 35 до 45 години.
Од Министерството за внатрешни работи претходно информираа дека несреќата била пријавена во 08:17 часот. При ископ на темели на градилиштето, дошло до свлекување на земјен насип, при што работниците останале затрупани.
По пријавата, на терен веднаш беа упатени екипи на полицијата, пожарникари и претставници од Центарот за управување со кризи, кои заеднички ја спроведоа акцијата за извлекување на затрупаните лица. Повредените работници се пренесени во Комплексот клиники „Мајка Тереза“ каде им се укажува лекарска помош.
На местото на несреќата се врши увид, по кој ќе се утврдат точните причини и околностите под кои се случила оваа трагедија.