Министерот за надворешни работи и надворешна трговија, Тимчо Муцунски, соопшти дека операцијата за евакуација на македонските државјани од регионот на Заливот е официјално завршена. Сите кои побарале помош од државата се безбедно вратени, а нови евакуации не се планираат.
„Ги организиравме чартер летовите и ги евакуиравме сите наши граѓани кои до тој момент бараа евакуација. По тој процес, веќе немаме намера да организираме нови евакуации“, изјави Муцунски на заедничката прес-конференција со казахстанскиот колега Арман Шакалиев.
Министерот потенцираше дека граѓаните кои одлучиле да останат во регионот, и покрај безбедносните предизвици, тоа го направиле на сопствен ризик. Покрај македонските државјани, во операцијата биле евакуирани и граѓани од соседните земји и од земјите-членки на ЕУ.
Во однос на финансискиот аспект, Муцунски истакна дека државата донела одлука целосно да ги покрие трошоците за евакуацијата, за разлика од многу други земји кои барале рефундација од своите граѓани.