Пред почетокот на денешното рочиште за пожарот во дискотеката „Пулс“ во Кочани, одбраната на првообвинетиот Дејан Јованов Деко побара замена на мерката притвор со куќен притвор. Бранителот, адвокатката Ивана Коцевска, тврди дека здравствената состојба на нејзиниот клиент е сериозно влошена, што, според неа, го прави понатамошниот престој во затворски услови нехуман.
„Мерката притвор не соодветствува со целта; ова не е мерка за обезбедување присуство, туку казна пред судење. Дејан денеска беше спроведен од болнички услови на судење со отворена рана по оперативен зафат“, изјави Коцевска пред судот во „Идризово“.
Од друга страна, судијката Дијана Груевска Илиевски истакна дека судот е целосно запознаен со здравствениот статус на обвинетиот. Таа појасни дека со негова согласност тој бил опериран во петокот, а препорачаното време за мирување е поминато, врз основа на што е донесена одлуката за негово спроведување во судницата.
Јавното обвинителство, кое во овој предмет е претставено од тим од 15 обвинители, најави дека дополнително ќе се произнесе по барањето на одбраната откако ќе ја разгледа документацијата.
Пожарот во „Пулс“, кој се случи на 16 март 2025 година, останува една од најтешките трагедии во земјата со 63 загинати и над 200 повредени. Судењето продолжува со сослушување на сведоци.