Премиерот Христијан Мицкоски порача дека државата е целосно подготвена да одговори на сите енергетски предизвици и дека во овој моменти нема никакви пречки во снабдувањето со нафта и нафтени деривати. При присуството на поставување камен-темелник во општина Ѓорче Петров, тој истакна дека Македонија во моментов нуди убедливо најевтини горива во целиот регион.
Според премиерот, цевководот кој го поврзува Солунското пристаниште со рафинеријата „Окта“ е веќе оперативен, а државните резерви се во одлична состојба.
„Состојбата со нафтата и нафетните деривати – дизел-горивата, безоловните бензини, керозинот… се во исклучително добра состојба. Како држава во овој момент не гледаме какви било предизвици во синџирот на снабдување. Во постојана координација сме со снабдувачите“, изјави Мицкоски.
Тој посочи дека поради ниските цени, потрошувачката на пограничните места е зголемена и до 30 проценти, бидејќи граѓаните од соседните држави масовно точат гориво кај нас. Мицкоски појасни дека дизелот во Македонија е за 0,6 евра поевтин од Грција и за 0,3 евра од Србија.
Премиерот нагласи дека земјата веќе рефлектира стабилност во регионот и дека е поминато времето кога државата „коленичела и молела за помош“.