На меѓународниот аеродром „Свети Апостол Павле“ во Охрид денеска и утре ќе се реализира симулациска вежба за справување со вонредни состојби. Како што информираат од Министерството за внатрешни работи, активностите ќе започнат денеска во 15:00 часот, додека за утре почетокот е закажан во 13:30 часот.
Главната задача на оваа вежба е да се тестираат капацитетите на полицијата и останатите служби во реални услови.
„Целта на вежбата е проверка на подготвеноста, координацијата и ефикасноста на надлежните институции во услови на кризни и вонредни ситуации“, велат од МВР.
Од министерството упатуваат апел до граѓаните да бидат смирени, бидејќи станува збор за планирана активност која вклучува употреба на опрема и маневри со цел зголемување на безбедносните стандарди на аеродромот.