Новоименуваниот претседател на Регулаторната комисија за енергетика (РКЕ), Ацо Ристов, денеска официјално ја презеде функцијата од досегашниот заменик-претседател Лирим Сулејмани. На чинот на примопредавање, Ристов беше детално информиран за клучните процеси во секторите енергетика, водни услуги и новиот сектор – управување со комунален отпад.
На првиот работен состанок со членовите на комисијата, во центарот на вниманието беше справувањето со актуелната нафтена криза.
„Во фокус на состанокот беше начинот како РКЕ делува во време на ценовна нафтена криза и мерките кои се преземени со цел амортизирање на ценовниот удар на нафтените деривати“, соопштија од РКЕ.
Покрај кризните мерки, на Ристов му беа презентирани и обврските за усогласување на македонското законодавство со европското, како дел од реформите предвидени во новиот Закон за енергетика.