Министерството за внатрешни работи (МВР) ги известува граѓаните на Скопје дека утре (6 април 2026 година), со почеток во 12:30 часот, ќе биде воведен посебен режим на сообраќај во централното градско подрачје поради најавен протестен марш.
Протестот го организира група граѓани кои сакаат да изразат незадоволство поради неспроведувањето на Законот за употреба на јазиците при полагањето на правосудниот испит.
Според најавите од полицијата, маршот ќе започне пред плоштадот „Карпошово востание“. Од таму, демонстрантите ќе се движат по улицата „11-ти Март“, ќе поминат преку Камениот мост и ќе продолжат по улицата „Никола Вапцаров“. Крајната дестинација на протестот е улицата „Димитрие Чуповски“, односно пред зградата на Министерството за правда.
Поради движењето на толпата, Единицата за безбедност на патниот сообраќај при СВР Скопје ќе воведе посебен сообраќаен режим. Возилата ќе бидат пренасочувани по околните сообраќајници за време на одржувањето на маршот.
Од МВР упатуваат апел до сите учесници во сообраќајот да имаат трпение и строго да ги почитуваат наредбите кои ќе ги даваат униформираните полициски службеници на терен.