Животниот век на пациентите со рак на дојка, бели дробови и меланом прогресивно се зголемува, а овие дијагнози полека преминуваат во категоријата на хронични болести. Ова го истакнаа директорите на Клиниката за радиотерапија и онкологија, д-р Игор Стојковски, и на Фондот за здравствено осигурување (ФЗО), Сашо Клековски, на денешната заедничка прес-конференција.
Според нив, намалената смртност и подолгиот животен век се директен резултат на поквалитетниот третман, иновативните лекови и значително зголемениот буџет за лекување по пациент.
Д-р Стојковски потенцираше дека иако бројот на новодијагностицирани случаи (инциденца) е релативно стабилен, вкупниот број на живи пациенти (преваленца) кои се лекуваат на Клиниката бележи драстичен скок токму поради продолжениот животен век.
„За канцер на дојка, до пред четири-пет години на Клиниката имаше околу 5.000 пациенти годишно, а оваа година и лани имаме 7.000. Кај пациенти со канцер на бели дробови имаме 1.200 годишно во 2020 година, а оваа година се околу 1.743. Најдрастично покачување има кај пациентите со меланом – оваа година се 514, а беа околу 200 во 2020“, посочи д-р Стојковски.
Директорот на ФЗО, Сашо Клековски, ја објасни директната корелација помеѓу финансиите и квалитетот на живот. Буџетот за Онкологија, кој до 2017 година изнесувал околу 10 милиони евра, за 2026 година е проектиран на 57 милиони евра (раст од 14% во однос на лани).
„Конкретно, за рак на дојка, во 2020 издвојувањата биле околу 700 евра по пациент, за сега да стигнат до 2.500 евра. Кај ракот на бели дробови… од неколку стотини евра, сега се вложува по 7.600 евра, а речиси 49 проценти од пациентите се вклучени на имунотерапија“, изјави Клековски.
Клековски најави и вклучување на два нови лека за рак на дојка оваа година, како и нова терапија за канцер на простата. На Клиниката во моментов функционираат три акцелератори, а денеска беше претставен и нов апарат за зрачење на метастази во мозокот, процедура за која пациентите досега мораа да патуваат во странство.