Министерството за дигитална трансформација и Државниот завод за статистика (ДЗС) промовираа три нови електронски услуги достапни на порталот uslugi.gov.mk. Станува збор за електронски обрасци наменети за студентите кои дипломирале на додипломски студии, како и за лицата кои се стекнале со називот магистер, специјалист или доктор на науки.
Министерот Стефан Андоновски истакна дека со овој чекор целосно се затвора пакетот услуги за високото образование. Најголемата придобивка за корисниците е драстичното кратење на времето за пополнување на документацијата. Наместо досегашните 10 минути, сега процесот трае само минута до две, бидејќи обрасците се веќе „предпополнети“ со податоци кои системот автоматски ги повлекува од постоечките бази.
„Наша задача е да ја обезбедиме платформата, а институциите како ДЗС покажуваат колку таа може да биде корисна“, изјави Андоновски, додавајќи дека бројот на е-услуги на месечно ниво пораснал за дури 10 пати.