Владата ќе ја засили сајбер безбедноста преку формирање нов центар за одговор на сајбер инциденти, најави министерот за дигитална трансформација Стефан Андоновски.
Во гостување во емисијата „Клик Плус“ на ТВ21, тој посочи дека за реализација на проектот се обезбедени околу 1,5 милиони евра, дел од нив преку поддршка од Европската Унија.
– Со заеднички средства од ЕУ и од државниот буџет инвестираме во Владин центар за одговор на сајбер инциденти. Целта е навремено да се следат и адресираат заканите во сајбер просторот – изјави Андоновски.
Тој објасни дека со воспоставувањето на овој центар институциите ќе добијат поголем капацитет за справување со сè почестите и пософистицирани сајбер напади.
Министерот се осврна и на состојбите во ИТ секторот, оценувајќи дека глобалните економски промени и развојот на вештачката интелигенција создаваат притисок врз домашниот пазар. Според него, приватниот сектор го намалил темпото на вработување, а платите во дел од индустријата стагнираат или се намалуваат, што доведува до зголемен интерес за вработување во јавната администрација.
Говорејќи за претстојната втора сесија од Стратешкиот дијалог со Соединетите Американски Држави, која ќе се одржи следната недела во Вашингтон, Андоновски нагласи дека станува збор за значаен дипломатски процес.
– Очекуваме конкретни резултати што ќе придонесат за подобрување на можностите за граѓаните, економијата и институционалната соработка, особено во областите на дигитализацијата и сајбер безбедноста – рече тој.
Андоновски предупреди дека сајбер нападите сè почесто се користат како средство за асиметрични закани, насочени кон критичната инфраструктура, вклучително и здравството, образованието и другите витални сектори.