Претседателот на Владата Христијан Мицкоски изјави дека не ги прифаќа нападите дека Законот за високо образование има престроги критериуми, нагласувајќи дека нема ниту еден универзитет во државата рангиран меѓу првите 2500 најдобри на Шангајската листа.
Во гостување во утринската емисија „Македонија наутро“ на МРТ тој рече дека бил разочаран од ставот на универзитетски професор кој го критикувал предложениот закон.
-Искрен да бидам, се разочарав, да не речам се шокирав. Во еден момент тезата беше дека критериумите се премногу строги за избор во звање. Зошто биле строги? Законот предвидува моите колеги да пишуваат научни трудови во реномирани списанија коишто се дел од Web of Science (Thomson Reuters) базата, и тоа четири трудови во рок од пет години за да бидат избрани за редовен професор, а државата тоа да им го надомести. Тоа е висок критериум, рече Мицкоски.
Тој додаде дека сегашната состојба резултира со тоа што ниеден универзитет во земјата не е меѓу 2500-те најдобри на Шангајската листа, вклучително и Универзитетот „Св. Кирил и Методиј“.
-Порано можев да кажам дека професорите се демотивирани поради ниски плати, но денес редовните професори имаат 110.000 до 120.000 денари плата и просек од 4 до 8 часа неделно предавања, додаде Мицкоски.
Тој посочи дека е погрешно само да се критикуваат критериумите како високи, без да се понудат легитимни аргументи, затоа што тоа влијае на квалитетот на кадрите што ги произведува образовниот систем и нивната подготвеност за предизвиците во професијата.
- Можам да погрешам, но не можам да прифатам дека ќе седи некој и ќе гледа како тонеме без да бара решение. Ако не работиме со вакви профили, се плашам дека образованието нема да произведе доволно квалитетен кадар кој веднаш ќе може да се соочи со предизвиците, заклучи Мицкоски.