Руски дрон погодил оџак на електраната „Овер“ во североисточна Естонија, потврдија утрово од естонската служба за внатрешна безбедност (ISS). Инцидентот се случил во близина на руската граница, а според првичните информации, нема повредени лица.
„Дронот влегол во естонскиот воздушен простор од рускиот воздушен простор“, се вели во соопштението на службата. Иако дронот ја погодил инфраструктурата, од Обвинителството сметаат дека леталото не било намерно насочено кон Естонија.
Државната обвинителка Астрид Аси изјави дека истрагата ќе ги разјасни поконкретните околности, но дека според сегашните податоци, „дронот не бил насочен кон Естонија“. На терен се веќе излезени деминери и истражни екипи под раководство на Обвинителството.
Од компанијата „Enefit Power“, која стои зад електраната, велат дека нема непосредна штета на објектот и дека инцидентот нема да влијае врз електроенергетскиот систем на земјата. Сепак, министерката за правда Лииса-Ли Пакоста најави итна владина седница поради сериозноста на безбедносната ситуација.
Генералниот директор на ISS, Марго Палосон, предупреди дека ова се ефекти од војната во Украина. „Можеме да претпоставиме дека ќе видиме повеќе вакви инциденти“, изјави тој, упатувајќи апел до јавноста да ги пријави сите информации поврзани со настанот.