Во акциска контрола на Мобилната единица за безбедност на сообраќајот на патиштата во Струга, вчера биле изречени 57 санкции, едно лице било лишено од слобода, а едно возило одземено, информираат од Министерство за внатрешни работи.
Од изречените мерки, четири се за истечена важност на сообраќајна дозвола, една за управување со моторно возило без соодветна категорија, три за неизвршен вонреден технички преглед на возила за јавен превоз на патници, една за управување на возач без лекарско уверение, седум за товарни возила поврзани со претовар, вонреден превоз и некористење на церада, пет за непоседување задолжителна опрема, две за користење мобилен телефон, две за неисправни светлосни уреди и 21 за други прекршоци.
Исто така, поднесени се 11 барања за поведување прекршочна постапка против правни и одговорни лица. Едно лице било лишено од слобода за кривично дело по член 297-а од Кривичниот законик – „безобѕирно управување со моторно возило“ без возачка дозвола, а едно возило било одземено поради истечена сообраќајна дозвола повеќе од шест месеци.
За сите сторители на сообраќајни прекршоци се изготвени соодветни поднесоци, а од МВР најавуваат дека сообраќајните контроли ќе продолжат и во наредниот период. Од таму апелираат до сите учесници во сообраќајот да ги почитуваат правилата и законските прописи.