Претседателот на СДСМ, Венко Филипче, во интервју за неделникот Фокус обвинува дека Владата наместо да ги заштити граѓаните од ценовните шокови од поскапувањето на горивата, дополнително се обидува да профитира врз нив.
„Секогаш кога расте цената на нафтата, поскапува храната и сите други продукти и услуги, а премиерот Христијан Мицкоски гледа само начин како да не им помогне на граѓаните“, вели Филипче. Тој додава дека Регулаторната комисија за енергетика ја промени фреквенцијата на пресметување на цените на горивата од дневна на неделна, што значи дека, и покрај намалувањето на цената на нафтата на светските берзи, граѓаните ќе плаќаат поскапи деривати цела недела.
„Со новиот правилник, додека цената на нафтата на светските берзи се движеше од 84 до 86 долари за барел, што е поевтино од минатонеделните 96 долари, граѓаните мораа да чекаат седум дена за РКЕ да направи корекција. Досега, поради ваквите одлуки, се собираат околу три милиони евра дополнително само за една недела“, објаснува Филипче.
Тој ги критикува и контрамерките на Владата: „Кој има интерес од ова поскапување и каде ќе завршат овие пари? Ова се пари на граѓаните, кои и така едвај го поминуваат месецот. Која влада, наместо да донесе мерки за помош на граѓаните, носи контрамерки за да им одмогне? Ете тоа е ВМРО – да зграби повеќе каде што може.“
Филипче исто така ги претставува предложените мерки на СДСМ за справување со ценовните шокови: „Предлагаме намалување на стапката на ДДВ од 18 на 5 отсто за сите енергенси, намалување на акцизата за 4 денари по литар, како и ДДВ од нула проценти за основните прехранбени производи, за да се ублажи евентуалниот скок на цените на храната. Зошто Владата ги одбива овие предлози?“