Мексиканскиот министер за надворешни работи Хуан Рамон дела Фуенте и американскиот државен секретар Марко Рубио остварија телефонски разговор во кој се согласија дека е потребно дополнително зајакнување на соработката за справување со заедничките безбедносни закани, пренесе агенцијата ЕФЕ.
Во заедничко соопштение, двајцата дипломати ја потврдија важноста на партнерството меѓу САД и Мексико, кое, како што наведоа, се темели на заемно почитување на суверенитетот. Притоа признаа дека и покрај постигнатиот напредок, „сè уште постојат значителни предизвици“.
Разговорот се одржал во чувствителен политички контекст, откако американскиот претседател Доналд Трамп изнесе изјави за можни копнени воени дејства на територијата на Мексико насочени против наркокартелите.
Во таа насока, двете страни се договорија билатералната група задолжена за спроведување на безбедносните мерки, чија следна средба е закажана за 23 јануари, да ги интензивира активностите против наркокартелите, како и против трговијата со фентанил и нелегалното оружје преку границата. Дополнително, најавено е дека следниот месец во Вашингтон ќе се одржи средба на министрите за безбедност.
Во посебно соопштение објавено на социјалните мрежи, Бирото за прашања на западната хемисфера при Стејт департментот на САД ја истакна потребата од „конкретни, проверливи резултати“ од страна на Мексико во борбата против наркотерористичките мрежи, оценувајќи дека бавниот напредок поврзан со граничната безбедност е неприфатлив.
Телефонскиот разговор меѓу министрите следеше по претходната комуникација меѓу претседателот Трамп и мексиканската претседателка Клаудија Шејнбаум, која јасно порача дека американска воена интервенција во Мексико е исклучена. Таа, сепак, не ја исклучи можноста за лична средба со Трамп по официјалните настани поврзани со одбележувањето на годишнината од неговото стапување на должност на 20 јануари.
Шејнбаум истакна и дека двете земји имаат обемен список на заеднички приоритети, меѓу кои е и подготовката за Светското првенство во фудбал, кое во 2026 година заеднички ќе го организираат Мексико, САД и Канада, а чијшто свечен почеток ќе се одржи во Мексико на 11 јуни.