Малиот грчки остров Антикитера започна иницијатива за привлекување нови жители, нудејќи финансиска поддршка и обезбедено сместување за оние што се подготвени да се преселат. Со само 45 постојани жители, локалните власти се обидуваат да го спречат целосното исчезнување на населението и да му дадат нов живот на островот.
Програмата предвидува бесплатно сместување, храна и месечна финансиска поддршка за новите доселеници. Грција ќе исплаќа по 500 евра месечно во период од три години, што вкупно изнесува околу 18.000 евра по домаќинство. Иницијативата е насочена пред сè кон млади семејства и квалификувани работници кои би сакале да започнат нов живот на островот.
Антикитера се соочува со сериозен демографски проблем – најголемиот дел од сегашното население е над 50 години, а бројот на деца е минимален. Токму затоа, проектот има цел да привлече млади семејства кои ќе помогнат во ревитализација на заедницата и одржување на основните услуги.
Проектот го организира Грчката православна црква на Китира, која управува и со островот. Се бараат млади семејства, како и лица со занаетчиски и практични вештини, меѓу кои пекари, рибари и луѓе со деца. Планирано е да бидат примени најмногу пет семејства, а сите кандидати ќе мора да поминат интервју пред конечната одлука.
Иако на семејствата им се ветени нови куќи, нивната изградба сè уште не е започната поради административни доцнења. Досега, ниту едно семејство не се вселило во рамките на програмата.
До Антикитера може да се стигне со ферибот од островот Китира или од пристаништето Кисамос на Крит. Во зимскиот период на островот работи само една мала продавница со основни намирници, но има електрична енергија и интернет, што овозможува основни услови за живот, пренесува „Дневни