Иранските власти драстично го ограничија пристапот до интернет откако вчеравечер (8 јануари) земјата ја зафатија најголемите демонстрации од почетокот на протестниот бран. Снимките од социјалните мрежи и извештаите на странските агенции сведочат за драматична ескалација на насилството.
Во главниот град Техеран, илјадници луѓе излегоа на улиците. Активисти објавија видеа од запалени возила, додека очевидци за АФП потврдуваат дека безбедносните сили употребиле солзавец за да ги растераат маскираните демонстранти. Слични сцени на судири се забележани и во западниот град Абадан.
Протестите, кои првично беа поттикнати од високите трошоци за живот и лошата економија, влегоа во дванаесеттиот ден и се проширија во најмалку 50 градови низ целата земја.