Лидерот на СДСМ, Венко Филипче, експресно ја отфрли можноста за присуство на лидерската средба најавена од премиерот Христијан Мицкоски. Според Филипче, повикот за средба е само обид за создавање алиби за предвремени избори кои, како што тврди, се дел од поголемо сценарио поврзано со мигранти и финансиски задолжувања.
Филипче го обвини Мицкоски дека е во тесно и дека власта брза кон избори за да спроведе агенда за прифаќање мигранти во замена за кредити, повикувајќи се на информации од британските медиуми. Тој останува на ставот дека техничката влада е единствениот механизам за контрола на власта.
„Средба со криминалци нема да има. Нема средба за техничката влада. Мицкоски е во тесно, му се брза и бара алиби за распишување на предвремени избори,“ изјави Филипче.
Лидерот на опозицијата најави дека утре детално ќе ги образложи злоупотребите во правосудството кои, според него, ја прават неопходна техничката влада.