Дваесет и осум лица се спасени по потонувањето на туристичко бротче во Црвеното Море, во близина на пристаништето Хамата, јужно од египетскиот туристички центар Марса Алам, објави весникот „Ал Ахрам“.
Станува збор за туристичкото бротче „Ла Вила“, на кое се наоѓале 20 туристи од различни националности и осумчлен египетски екипаж. Пловилото удрило во морското дно и се заглавило, по што започнала итна евакуација.
Во спасувачката акција учествувале блиски пловни објекти, кои успеале безбедно да ги евакуираат сите 28 лица и да ги пренесат на брегот. Во инцидентот нема загинати ниту повредени.
Надлежните органи отворија истрага за да ги утврдат причините за несреќата.
Ова е уште еден во низата инциденти со туристички пловила во регионот. На крајот од ноември минатата година туристичко бротче потона во близина на Марса Алам, при што беа спасени сите 30 лица на бродот, вклучително и девет членови на екипажот. Една година претходно, во сличен инцидент со бродчето „Си Стори“ кај истото одморалиште загинаа 11 лица, додека во март 2025 година шест лица загинаа, а девет беа повредени при потонување на туристичка подморница кај Хургада.