Линеарното зголемување на пензиите е клучната мерка со која Владата планира трајно да го подигне животниот стандард на највозрасните граѓани. Премиерот Христијан Мицкоски, при денешната посета на Кочани, истакна дека процесот кој започна во ноември 2024 година ќе се заокружи во април 2026 година, со што секој пензионер ќе добие вкупно зголемување од 7.000 денари.
„Не треба да заборавиме еден важен параметар – 150 илјади пензионери, пред да почне ова линеарно зголемување, имаа пензии кои се движеа околу 10 до 12 илјади денари. Тоа е речиси половина од вкупно 330 илјади пензионери во државата“, објасни Мицкоски.
Според премиерот, со целосната имплементација на оваа мерка, оваа категорија на граѓани веќе нема да биде под прагот на 15.000 денари. „Со овие 7.000 денари плус, тие немаат пензија под 15 илјади, туку сите се движат од 17 до 19 илјади денари. Како Влада ќе продолжиме во таа насока“, дециден е Мицкоски.
Тој смета дека линеарниот модел, за разлика од процентуалниот, директно влијае на намалување на јазот меѓу богатите и сиромашните, обезбедувајќи поправична распределба на средствата.