Грчките земјоделци денеска го затворија граничниот премин Евзони кон нашата земја за влез и излез од Грција за сообраќај на сите возила до 16 часот по грчко, односно 15 часот по македонско време. За попладневните часови најавена е и втора четиричасовна блокада, од 18 часот по локално време, јави дописничката на МИА од Атина.
По четиридневна пауза, за време на која автопатиштата и граничните премини беа отворени поради Божиќните празници, земјоделците од денеска повторно ги активираа блокадите на повеќе локации низ цела Грција.
На граничниот премин Евзони, кусо пред 12:30 часот по локално време, тракторите паркирани на грчката страна ја блокираа границата за сите возила. Според информациите на МИА, сообраќајот ќе биде во прекин до 16 часот по грчко (15 по македонско време), по што преминот ќе се отвори на два часа. Новата блокада е најавена од 18 до 22 часот по грчко, односно од 17 до 21 часот по македонско време.
За патниците кои патуваат кон Грција, граничните премини Ники (Меџитлија) и Дојран засега се отворени за сообраќај.
На Ники постои можност за нови блокади, бидејќи и таму се паркирани трактори, додека на Дојран засега нема поставено блокада и сообраќајот се одвива непречено.
Според информациите на дописничката на МИА од Атина, не е исклучено и утре повторно да има две четиричасовни блокади на Евзони во истите термини како и денеска, односно прекин на сообраќајот меѓу 12 и 16 часот и од 18 до 22 часот по грчко време.
Блокадите на Евзони започнаа на 1 декември, кога земјоделците од регионот Пеонија и градот Јаница пристигнаа со трактори, кои и понатаму остануваат паркирани на грчката страна од границата. Во изминатиот период граничниот премин беше блокиран, со исклучок на празничниот период за Божиќ.
Во текот на денешниот ден повторно се активираат и повеќе блокади на автопатиштата низ цела Грција, кои ќе траат до вторник.
На автопатот Солун–Атина, кај патарините Малгара на излезот од Солун, сообраќајот кон Атина е затворен, а од понеделник, во период од два дена, се очекува затворање на сообраќајот во двата правци.
Според најавите, од вторник до петок, поради новогодишните празници, повторно ќе бидат отворени сите автопатишта и гранични премини, како што беше случај и за Божиќ, со цел да се олесни патувањето на граѓаните.
Протестите на грчките земјоделци започнаа на 30 ноември, поради зголемените трошоци за производство, ниските откупни цени, како и поради скандалот со европските земјоделски субвенции. Нивното главно барање е исплатата на заостанатите субвенции.