Земјоделците од цела Грција, на денешниот масовен состанок во Лариса, донесоа одлука да ја одбијат отворената покана за средба со грчкиот премиер Киријакос Мицотакис закажана за понеделник во 17 часот.
Земјоделците одлучија:
- Да не се сретнат со премиерот Мицотакис во понеделник.
- Писмено да ги испратат своите барања до Владата и надлежните министри.
- Да не се повлечат од блокадите, туку дополнително да ги интензивираат протестите.
Според државната новинска агенција АНА-МПА, земјоделците истакнале дека дијалогот нема суштинска содржина без конкретни решенија и опипливи одговори на нивните барања.
Протестите, кои започнаа на 30 ноември поради зголемените трошоци за производство, ниските цени и скандалот со субвенциите, продолжуваат низ цела Грција:
Автопатот Солун – Атина е затворен кај Никеа (Лариса), а сообраќајот се пренасочува по споредни патишта.
Блокадите продолжуваат и на граничните премини кон Северна Македонија (Евзони), Бугарија и Турција, со што сообраќајот е отежнат и не се очекува нормализирање.
Главното барање останува итна исплата на заостанатите европски земјоделски субвенции.