Градоначалникот Орце Ѓорѓиевски денеска ја пречека американската амбасадорка Анџела П. Агелер во нејзината прва официјална посета на Град Скопје.
Средбата била насочена кон продлабочување на стратешкото партнерство меѓу САД и Градот, со главни приоритети: институционален развој, економски напредок и борба против корупцијата.
Ѓорѓиевски ја истакна клучната порака од средбата:
„Особено важно беше заедничкото согледување на потребата од бескомпромисна борба против корупцијата на сите нивоа. Се согласивме дека само со транспарентност, отчетност и силни институции можеме да изградиме модерно и доверливо општество.“
Градоначалникот ја информирал амбасадорката за реализацијата на изборната програма и тековните проекти, нагласувајќи дека поддршката од САД е од огромно значење за напредокот на Скопје.