Предлогот за разрешување на републичкиот јавен обвинител Љупчо Коцевски денеска пристигна во Собранието. Со ова се продолжува постапката која претходно беше поведена од Владата, но беше привремено стопирана поради законски ограничувања за време на изборниот период.
Владата на завчерашната седница го усвои предлогот, по претходно добиено негативно мислење од Советот за јавни обвинители.
Портпаролката Марија Митева ги образложи причините за предлогот, кој се темели на членот 88 став 1 од Законот за јавното обвинителство.
„Врз основа на членот 88 став 1 од Законот за јавното обвинителство… му предлага на Собранието од функцијата јавен обвинител на Република Македонија да го разреши Љупчо Коцевски, поради направени крупни професионални грешки при раководењето со Јавното обвинителство што доведува до нарушување на ефикасноста и функционалноста на Јавното обвинителство.“
Повреди кои се ставаат на товар на Коцевски:
- Неовластено изнесување информации и податоци за судски предмети, со што е повредена обврската за тајност на постапката.
- Нарушување на угледот на Јавното обвинителство и неговиот личен углед.
- Непостапување согласно обврските предвидени со Уставот, законите и меѓународните договори.
Од Владата посочуваат дека како последица на овие повреди, во изминатиот период е евидентна нарушената функционалност на Јавното обвинителство и сериозно е нарушен интегритетот на институцијата.
Владата првично донесе одлука за поведување постапка за разрешување на Коцевски на 11 февруари годинава. Потоа, постапката беше запрена по пожарот во дискотеката „Пулс“ во Кочани.
Во меѓувреме, на 26 јуни, пратеничката група на Левица поднесе интерпелација за Коцевски поради „нефункционална состојба, неажурност и надворешни политички влијанија“, која беше изгласана од Собранието на 29 јули. Потоа, постапката повторно беше стопирана поради предизборни законски ограничувања.
Премиерот Христијан Мицкоски вчера изјави дека очекува целата процедура за избор на нов главен јавен обвинител да се одвива брзо. За негативното мислење на Советот за јавни обвинители, тој рече дека Владата има поинакво мислење.
Љупчо Коцевски беше именуван за републички јавен обвинител на 13 февруари 2024 година.