Денеска во судницата во Идризово продолжува судењето за трагичниот пожар во дискотеката „Пулс“ во Кочани, каде што животот го загубија 63 лица, меѓу кои и деца, а над 200 беа повредени.
На денешната главна расправа се очекува да се продолжи со произнесување на вина и воведни зборови на одбраната.
На минатото рочиште, Судот ги прифати приговорите на одбраната дека обвинението со листата на докази не им било доставено на обвинетите, поради што расправата беше одложена. Судот, за да не се одолговлекува постапката, донесе одлука оштетните побарувања да се остваруваат во граѓанска постапка, а присутните оштетени се приклучија кон кривичниот прогон.
Обвинителот Борче Јанев на првото рочиште нагласи дека се бара одговорност „по име и презиме“, и дека општеството мора да се соочи со болната вистина.
„Не е важно само кој го запалил огнот, важно е кој имал кофа вода и не ја истурил… Катастрофата не е резултат само на пиротехниката, туку на години институционален молк, пропусти и недостиг од контрола кои го претвориле клубот во смртоносна стапица,“ изјави Јанев.
Судењето се одвива под засилени безбедносни мерки. Покрај обвинетите, присутни се роднини на настраданите, обвинители (тим од 15), бранители и медиуми. Судењето го води судијката Диана Груевска Илиевска.
Трагедијата од 16 март 2025 година е резултат на систематска негрижа:
- Дискотеката функционирала незаконски повеќе од една деценија без минимално-технички услови, со реконструкции без дозволи.
- Објектот немал противпожарен систем, имал затворени прозорци и само еден излез за евакуација.
- Користени биле лесно запаливи и токсични материјали (сунѓер на плафонот).
- Критичната вечер бил дозволен неконтролиран влез на над 600 гости, меѓу кои и малолетници, со договорен настап на групата „ДНК“ и употреба на пиротехника.
На обвинителна клупа се 37 обвинети: 34 физички и три правни лица, вклучувајќи сопственици, управители, инспектори, поранешни градоначалници и државни службеници.