Војната не е завршена и Хамас ќе биде разоружан, изјави израелскиот премиер Бенјамин Нетанјаху во обраќањето пред Кнесетот, израелскиот парламент.
„Оние кои сакаат да ни наштетат повторно се вооружуваат. Тие не се откажале од својата цел да нè уништат. Хамас ќе биде разоружан. Газа ќе биде демилитаризирана. Тоа ќе се случи или на лесен или на тежок начин. Но, тоа ќе се случи“, рече Нетанјаху, според „Тајмс оф Израел“.
Израелскиот премиер оцени дека Израел се приближува до земјите во регионот повеќе од кога било и додаде дека јавноста ќе слушне повеќе за тоа.
„Израел е решен да ги спроведе договорите за прекин на огнот во Газа и Либан со „железна тупаница“. Можете да видите што се случува секој ден во Либан“, рече тој.
Нетанјаху изјави дека воениот притисок врз Хамас и операцијата на израелските одбранбени сили во Газа, заедно со дипломатскиот притисок од САД за изолирање на Хамас, им овозможиле на сите живи заложници и на огромното мнозинство од паднатите заложници да се вратат дома.