Министерот за земјоделство, шумарство и водостопанство, Цветан Трипуновски, денеска апелираше за темелна истрага на случајот со директорот на Агенцијата за поддршка на земјоделството и руралниот развој (АПЗРР), кој беше фатен како прима мито од 400 евра за да овозможи нелегално користење на ИПАРД средства.
Трипуновски беше дециден дека овој случај не претставува никаква закана за европските фондови:
„Нема никаква загрозеност по ИПАРД средствата ниту по националните плаќања што ги имаме како држава.“
Според министерот, апсењето на функционерот е доказ за неселективна борба против корупцијата, за разлика од претходната власт:
„Владата покажува неселективна борба против корупцијата и злоупотребата на службената положба. Ваквите случаи во минатото не се случуваа, некако претходната власт сакаше да го затскрие секој криминал. Под притисок на јавноста можеби ќе се преземеше некаков активност, повеќе шминка отколку дела.
Министерот ги повика надлежните институции да го истражат целиот случај до крај за да се превенираат идни дејствија, а ги охрабри и граѓаните:
„Ги повикувам сите граѓани, без разлика дали се правни или физички лица, доколку имаат индиции за вакви случаи, да ги пријават.“
Во однос на барањето од опозицијата за негова оставка, Трипуновски не гледа никаква поврзаност, потенцирајќи дека Агенцијата е посебна институција со сопствен менаџмент и управувачко тело.